ವಾರ ಭವಿಷ್ಯ

Home ವಾರ ಭವಿಷ್ಯ

ದಿನಾಂಕ : 13.02.2022 ರಿಂದ 19.02.2022

ಜಯತೀರ್ಥಾಚಾರ್ ವಡೇರ್, ದಾವಣಗೆರೆ. 

ಮೇಷ (ಅಶ್ವಿನಿ, ಭರಣಿ, ಕೃತ್ತಿಕಾ)
(ಚೂ.ಚೇ.ಚೋ.ಲ.ಲಿ.ಉ.ಲೇ.ಲೊ.ಅ.)

ಈ ವಾರ ಹಣಕಾಸಿನ ಹರಿವು ಸಾಕಷ್ಟು ಉತ್ತಮವಾಗಿರುವುದರಿಂದ ಅದರ ಬಗ್ಗೆ ಚಿಂತೆಬೇಡ, ವಿದೇಶದಲ್ಲಿ ಹೂಡಿರುವ ಬಂಡವಾಳ ಹೆಚ್ಚಿನ ಲಾಭ ತರಲಿದೆ, ಕೌಟುಂಬಿಕ ವಿಚಾರಗಳು ಸಾಕಷ್ಟು ಭಿನ್ನವಾಗಿರುತ್ತವೆ, ಮನೆಯಲ್ಲಿ ವಾಗ್ವಾದ, ಮಾನಸಿಕ ನೆಮ್ಮದಿ ಹಾಳಾಗಬಹುದು. ಜೊತೆಗೆ ಬಂಧುಗಳ ನಡುವೆ ಭಿನ್ನಾಭಿಪ್ರಾಯ ಮೂಡಲಿದೆ.ವಿದ್ಯಾರ್ಥಿಗಳು ತಮ್ಮ ಅತಿಯಾದ ಚಿತ್ತ ಚಾಂಚಲ್ಯದಿಂದಾಗಿ ಅಧ್ಯಯನದಲ್ಲಿ ಗೊಂದಲ, ಕರಿದ ಮತ್ತು ಸಿಹಿ ಪದಾರ್ಥಗಳ ಮಾರಾಟಗಾರರಿಗೆ ಲಾಭ, ಹಿರಿಯರನ್ನು ಸಂತೋಷವಾಗಿರಿಸಿ, ಹರಿತವಾದ ಆಯುಧಗಳಿಂದ ಎಚ್ಚರಿಕೆ, ಗುರುಗಳ ಅನುಗ್ರಹ ಸಂಪಾದಿಸಿರಿ. ಸೋಮ-ಬುಧ-ಗುರು-ಶುಭ ದಿನಗಳು


ವೃಷಭ (ಕೃತ್ತಿಕಾ, 2,3,4, ರೋಹಿಣಿ, ಮೃಗ 1,2)
(ಇ.ಉ.ಎ.ಒ.ವ.ವಿ.ವು.ವೆ.ವೋ)

ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುವವರಿಗೆ ಅನಿರೀಕ್ಷಿತ ಏರಿಳಿತವಾಗಲಿದೆ. ಈ ವಿಷಯವನ್ನು ಸಾಕಷ್ಟು ಗಂಭೀರವಾಗಿ ತೆಗೆದುಕೊಳ್ಳುವುದು ಉತ್ತಮ. ಮಾತಿನಲ್ಲಿ ಹಿಡಿತವಿರಲಿ, ಸಂಪನ್ಮೂಲಗಳು ಸಾಕಷ್ಟು ಉತ್ತಮವಾಗಿರುವುದರಿಂದ ಅದರ ಬಗ್ಗೆ ಚಿಂತೆಬೇಡ. ನಿವೇಶನ ಮಧ್ಯವರ್ತಿಗಳಿಗೆ ಹೆಚ್ಚಿನ ಕಮೀಷನ್‌, ಕೃಷಿಕ ಮಿತ್ರರಿಗೆ ಜಮೀನಿಗೆ ಸಂಬಂಧಪಟ್ಟ ಕಾನೂನಿನ ತೊಡಕುಗಳು, ಉಪನ್ಯಾಸಕ ವೃತ್ತಿಯಲ್ಲಿರುವವರಿಗೆ ಶುಭ ಸಮಾಚಾರ, ಸೋದರಿಯರೊಂದಿಗೆ ವಿನಾಕಾರಣ ಮನಸ್ತಾಪ,  ವೈದ್ಯಕೀಯ ವ್ಯಾಸಂಗ ಮಾಡುತ್ತಿರುವವರಿಗೆ ತಾತ್ಕಾಲಿಕ ಹಿನ್ನಡೆ. ಗುರು -ಶುಕ್ರ -ಶನಿ -ಶುಭ ದಿನಗಳು.


ಮಿಥುನ (3,4, ಆರಿದ್ರಾ, ಪುನರ್ವಸು 1,2,3)
(ಕ.ಕಿ.ಕು.ಘ, ಔ, ಚ.ಕೆ.ಕೋ.ಹ.)

ವಾರಾಂತ್ಯದಲ್ಲಿ ಹೆಚ್ಚು ಸಂತೋಷದಿಂದ ಕಳೆಯುವಿರಿ. ಅಂದುಕೊಂಡ ಕೆಲಸಗಳೆಲ್ಲವೂ ಸುಲಲಿತವಾಗಿ ನಡೆಯಲಿವೆ. ಹೊಸ ಯೋಜನೆಗಳಿಗೆ  ಒಂದು ರೂಪುರೇಷೆ ಬರಲಿದ್ದು, ಅದಕ್ಕೆ ಬೇಕಾದ ಆರ್ಥಿಕ ನೆರವೂ ಸಹ ಸಿಗಲಿದೆ. ಹಣಕಾಸು ಸಂಸ್ಥೆಗಳಲ್ಲಿ ಕೆಲಸ ಮಾಡುವವರು ವಂಚಕರಿಂದ ಮೋಸಹೋಗುವ ಸಂಭವವಿದೆ. ನಿಮ್ಮ ಕೆಲವು ವೈಯಕ್ತಿಕ ಸಮಸ್ಯೆಗಳಿಗೆ ನಿಮ್ಮಲ್ಲೇ ಉತ್ತರ ಸಿಗಲಿದೆ, ದೂರ ಪ್ರಯಾಣ ಅನಿವಾರ್ಯ, ಆರೋಗ್ಯದ ವಿಚಾರದಲ್ಲಿ ರಾಜೀ ಮಾಡಿಕೊಳ್ಳಬೇಡಿ. ಅಪರಿಚಿತರೊಂದಿಗೆ ಮಾಡುವ ವ್ಯವಹಾರ ಅಪಮಾನಕ್ಕೆ ಕಾರಣ. ಭಾನು- ಬುಧ-ಗುರು- ಶುಭ ದಿನಗಳು.


ಕರ್ಕಾಟಕ (ಪುನ 4, ಪುಷ್ಯ, ಆಶ್ಲೇಷ)
(ಹಿ.ಹು.ಹೆ.ಹೂ.ಡ.ಡಿ.ಡು.ಡೆ.ಡೋ)

ಸಾಮಾಜಿಕವಾಗಿ ಗುರುತಿಸಿಕೊಂಡಿರುವ ನಿಮಗೆ ಹಲವಾರು ಗೌರವಾನ್ವಿತರ ಸಂಪರ್ಕವಾಗಲಿದೆ. ಇದು ನಿಮ್ಮ ಮುಂದಿನ ಬೆಳವಣಿಗೆಗೆ ಕಾರಣವಾಗಲಿದೆ.ರಾಜಕಾರಣಿಗಳು ತಮ್ಮ ಮುಂದಿನ ಭವಿಷ್ಯದ ಬಗ್ಗೆ ತಾಳ್ಮೆಯೊಂದಿಗೆ ವರಿಷ್ಠರೊಂದಿಗೆ ವರ್ತಿಸುವುದು ಮೇಲು. ಅಪರಿಚಿತ ಮಹಿಳೆಯರೊಂದಿಗೆ ಎಚ್ಚರವಾಗಿರಿ, ಮಕ್ಕಳ ವಿದ್ಯಾಭ್ಯಾಸದಲ್ಲಿ ತುಸು ಹಿನ್ನಡೆ ಕಂಡರೂ ತಾತ್ಕಾಲಿಕವಾಗಲಿದೆ. ಆರ್ಥಿಕ ಪರಿಸ್ಥಿತಿ ಸಾಧಾರಣವಾಗಿರುವುದರಿಂದ, ಖರ್ಚು-ವೆಚ್ಚಗಳ ಮೇಲೆ ಹಿಡಿತ ಸಾಧಿಸುವುದು ಮೇಲು.ಇಲ್ಲವಾದಲ್ಲಿ ಉಳಿತಾಯದ ಗಂಟೂ ಕೂಡ ಕರಗಬಹುದು. ಗುರುಗಳ ಆಶೀರ್ವಾದ ಪಡೆಯಲು ಪ್ರಯತ್ನಿಸಿ. ಸೋಮ-ಮಂಗಳ-ಶುಕ್ರ-ಶುಭ ದಿನಗಳು.


ಸಿಂಹ ( ಮಘ, ಪುಬ್ಬ, ಉತ್ತರ 1)
(ಮ.ಮಿ.ಮು.ಮೋ.ವೆ.ಟ.ಟಿ.ಟು.ಟೆ)

ಸರಳ ಜೀವನ ಶೈಲಿಗೆ ಸಾಕಷ್ಟು ಒತ್ತುಕೊಡುವುದರಿಂದ ಹಣಕಾಸಿನ ಮುಗ್ಗಟ್ಟಿನಿಂದ ಹೊರಬರಲು ಸಾಧ್ಯ. ವಿವಿಧ ರೀತಿಯಲ್ಲಿ ಕಮೀಷನ್‌ ಏಜೆಂಟರುಗಳಿಗೆ ಆದಾಯ ಹೆಚ್ಚಲಿದೆ. ಖಾಸಗಿ ಕಂಪನಿ ಉದ್ಯೋಗಿಗಳಿಗೆ ಸಹೋದ್ಯೋಗಿಗಳಿಂದಲೇ ಹೆಚ್ಚಿನ ಉಪಟಳ, ಇದನ್ನು ತಾಳ್ಮೆಯಿಂದ ಹಾಗೂ ಉಪಾಯದಿಂದ ಎದುರಿಸುವುದನ್ನು ಕಲಿಯಿರಿ.ವೈಯಕ್ತಿಕ ಜೀವನದಲ್ಲಿ ಸಾಕಷ್ಟು ಸುಖ ಸಂತೋಷವನ್ನು ಕಾಣುವಿರಿ. ಚಿಕ್ಕಮಕ್ಕಳ ಆರೋಗ್ಯದಲ್ಲಿ ವ್ಯತ್ಯಾಸ, ಸೂಕ್ತ ವೈದ್ಯರ ಸಲಹೆ ಪಡೆಯಿರಿ, ಕಟ್ಟಡ ಸಾಮಗ್ರಿಗಳ ಮಾರಾಟಗಾರರಿಗೆ  ಹೆಚ್ಚಿನ ವ್ಯಾಪಾರದೊಂದಿಗೆ ಲಾಭಾಧಿಕ್ಯವಾಗಲಿದೆ. ನೀವು ಬದಲಾಯಿಸಲು ಬಯಸಿರುವ ಹೊಸ ಉದ್ಯೋಗದ ಬಗ್ಗೆ ಸಾಕಷ್ಟು ಚೆನ್ನಾಗಿ ಮೊದಲೇ ತಿಳಿದುಕೊಳ್ಳವುದು ಮೇಲು.  ಭಾನು-ಬುಧ-ಗುರು-ಶುಕ್ರ-ಶುಭ ದಿನಗಳು.


ಕನ್ಯಾ (ಉತ್ತರಾ 2,3,4, ಹಸ್ತಾ, ಚಿತ್ತಾ 1,2)
(ಟೋ.ಪ.ಪಿ.ಪು.ಷ.ಣ.ಠ.ಪೆ.ಪೋ)

ಆರಕ್ಷಣಾ ಇಲಾಖೆಯವರಿಗೆ ಹುದ್ದೆಯಲ್ಲಿ ಪದೋನ್ನತಿ, ವ್ಯವಹಾರಗಳಲ್ಲಿ ಸ್ವಂತ ನಿರ್ಣಯ ಬೇಡ, ಆದಾಯದ ಮೂಲದಲ್ಲಿ ಹೆಚ್ಚಳ, ಸಾಮಾಜಿಕ ಸೇವೆಯಲ್ಲಿರುವವರಿಗೆ ವೈಯಕ್ತಿಕ ಬದುಕಿನಲ್ಲಿ ಕೊಂಚ ಅಡಚಣೆಗಳು ಅನಿವಾರ್ಯ, ಕೃಷಿಗೆ ಸಂಬಂಧಪಟ್ಟ ಉಪಕರಣಗಳ ಮಾರಾಟಗಾರರಿಗೆ ಲಾಭ. ಮನೆಯಲ್ಲಿ ನಡೆಯಲಿರುವ ಮಂಗಳ ಕಾರ್ಯಗಳ ವಿಚಾರದಲ್ಲಿ ಹಿರಿಯರೊಂದಿಗೆ ಕಾವೇರಿದ ಚರ್ಚೆ, ತಾಳ್ಮೆಯಿಂದ ಇರುವುದು ಒಳ್ಳೆಯದು. ವ್ಯಾಪಾರದ ವಿಸ್ತರಣೆ ವಿಚಾರವನ್ನು ಸದ್ಯದ ಮಟ್ಟಿಗೆ ಮುಂದೂಡಿ, ಆರೋಗ್ಯದಲ್ಲಿ ಎಚ್ಚರ, ಸೋಮ -ಬುಧ -ಶುಕ್ರ-ಶುಭ ದಿನಗಳು.


ತುಲಾ (ಚಿತ್ತಾ 3,4, ಸ್ವಾತಿ, ವಿಶಾಖ 1,2,3)
(ರ.ರಿ.ರು.ರೆ.ರೊ.ತ.ತಿ.ತು.ತೆ.)

ಸರ್ಕಾರದ ಉನ್ನತ ಹುದ್ದೆಯಲ್ಲಿರುವವರಿಗೆ ರಾಜಕಾರಣಿಗಳಿಂದ ಸ್ಥಳ ಬದಲಾವಣೆಯಾಗಲಿದ್ದು, ಅದರಿಂದ ಹೆಚ್ಚು ಪ್ರಯೋಜನವಾಗಲಿದೆ. ಯಂತ್ರೋಪಕರಣಗಳ ಬಿಡಿ ಭಾಗಗಳ ವಹಿವಾಟು ಹೆಚ್ಚಿದರೂ ಲಾಭಾಂಶ ಮಾತ್ರ ಅಷ್ಟಕ್ಕಷ್ಟೇ. ಕ್ರೀಡಾಪಟುಗಳಿಗೆ ಉತ್ತಮ ಅವಕಾಶಗಳು, ಆಸ್ತಿ ಅಥವಾ ಹೊಸ ಮನೆಕಟ್ಟುವ ವಿಚಾರದಲ್ಲಿ ಅವಸರದ ನಿರ್ಧಾರಬೇಡ, ಖಾಸಗಿ ಕಂಪನಿ ನೌಕರರು  ತರಬೇತಿ ನಿಮಿತ್ತ ದೂರದೂರಿಗೆ ಹೋಗಬೇಕಾದೀತು. ಶಸ್ತ್ರಚಿಕಿತ್ಸಾ ವೈದ್ಯರಿಗೆ ಆದಾಯದಲ್ಲಿ ಹೆಚ್ಚಳ, ಅಮೂಲ್ಯ ವಸ್ತುಗಳ ಬಗ್ಗೆ ಎಚ್ಚರದಿಂದಿರಿ. ಗುರು-ಶುಕ್ರ -ಶನಿ-ಶುಭ ದಿನಗಳು.


ವೃಶ್ಚಿಕ (ವಿಶಾಖ 4, ಅನೂ, ಜೇಷ್ಠ)
(ತೊ.ನ.ನಿ.ನು.ನೆ.ನೋ.ಯ.ಯು.)

ವೃತ್ತಿಯಲ್ಲಿ ಸಣ್ಣ-ಪುಟ್ಟ ಸಮಸ್ಯೆಗಳು, ಆದರೆ ವ್ಯವಹಾರ ಚತುರರಾದ ನೀವು ಅವುಗಳನ್ನು ನಿಭಾಯಿಸುವಿರಿ, ನಿಮಗೆ ಇಷ್ಟವಿಲ್ಲದಿದ್ದರೂ ಪ್ರಯಾಣವನ್ನು ಮಾಡಲೇಬೇಕಾದ ಪ್ರಸಂಗ, ಇದರಿಂದ ನಿಮಗೆ ಹೆಚ್ಚಿನ ಲಾಭ. ನಿಮ್ಮ ಮುಂದಾಲೋಚನೆಯನ್ನು ನಿಮ್ಮ ಎದುರಾಳಿಗಳೂ ಕೂಡಾ ಮೆಚ್ಚುವರು. ಗ್ರಾಹಕರೊಂದಿಗೆ, ಸೌಜನ್ಯದಿಂದ ನಡೆದುಕೊಳ್ಳಿ, ಸ್ವಂತ ಉದ್ಯಮ ಲಾಭದತ್ತ ಸಾಗಲಿದೆ. ಮಕ್ಕಳ ಇಚ್ಛೆಯಂತೆ ನಡೆಯುವುದರಿಂದ ಕೆಲವು ವಿಷಯಗಳಲ್ಲಿ ನಿಮ್ಮ ನಿರ್ಧಾರ ತಪ್ಪಾಗಬಹುದು. ಚಿನಿವಾರ ಪೇಟೆಯಲ್ಲಿ ವಹಿವಾಟು ಹೆಚ್ಚಾದರೂ ಲಾಭಾಂಶ ಕಡಿಮೆ. ಮತ್ತೊಬ್ಬರ ಹಣಕಾಸಿನ ವ್ಯವಹಾರದಲ್ಲಿ ಮಧ್ಯಸ್ಥರಾಗಲು ಹೋಗಬೇಡಿ. ಇಲ್ಲವಾದಲ್ಲಿ ಧನ, ಮಾನ ಹಾನಿಯಾಗಬಹದು. ಭಾನು-ಮಂಗಳ-ಬುಧ-ಶುಭ ದಿನಗಳು.


ಧನಸ್ಸು (ಮೂಲ, ಪೂರ್ವಾಷಾಡ, ಉತ್ತರಾಷಾಡ)
(ಯೆ.ಯೋ. ಬ.ಬಿ.ಬು.ಧ.ಫ.ಡ.ಬೆ.)

ನಿಮ್ಮ ಇಷ್ಟು ದಿನಗಳ ಪರಿಶ್ರಮಕ್ಕೆ ವಿರುದ್ಧ ದಿಕ್ಕಿನಲ್ಲಿ ಸಾಗಿದ್ದ ಕೆಲಸ ಕಾರ್ಯಗಳು ವೇಗದಲ್ಲಿ ಸಾಗಲಿದ್ದು, ಸಂತೃಪ್ತ ಭಾವದೊಂದಿಗೆ ಆತ್ಮವಿಶ್ವಾಸವನ್ನು ಹೆಚ್ಚಿಸಿಕೊಳ್ಳುವಿರಿ. ಸಂಕಷ್ಟದಲ್ಲಿರುವ ಗೆಳೆಯನಿಗೆ ನೆರವಾಗಬೇಕಾದ ಸನ್ನಿವೇಶ ಬರಲಿದೆ. ರೈತಾಪಿ ಮಿತ್ರರಿಗೆ ತಮ್ಮ ಆದಾಯದಲ್ಲಿ ಪಾಲು ಕೇಳುವವರ ಸಂಖ್ಯೆ ಹೆಚ್ಚಾಗಲಿದೆ. ಆಸ್ತಿ ಖರೀದಿ ವಿಚಾರದಲ್ಲಿ ಅವಸರ ಬೇಡ, ಹಿರಿಯರ ಆರೋಗ್ಯದಲ್ಲಿ ತೀವ್ರ ವ್ಯತ್ಯಾಸ, ಕೊಟ್ಟ ಸಾಲಗಳು ಕೈಸೇರಲಿದ್ದು, ಅದನ್ನು ಉಳಿತಾಯ ಮಾಡಿ, ವಿದ್ಯಾರ್ಥಿಗಳು ಓದಿನಲ್ಲಿ ಏಕಾಗ್ರತೆ ಇರಲಿ, ಮನೆಯಲ್ಲಿ ಶುಭ ಕಾರ್ಯಗಳು ನಡೆಯಲಿವೆ. ಮಂಗಳ-ಗುರು-ಶನಿ-ಶುಭ ದಿನಗಳು.


ಮಕರ (ಉತ್ತರಾಷಾಢ 2,3,4, ಶ್ರವಣ, ಧನಿಷ್ಠಾ 1,2)
(ಜೊ.ಜ.ಜಿ.ಜೆ.ಶಿ.ಶು.ಶೇ.ಶೋ.ಗ.ಗಿ)

ಸಂಶೋಧಕರಿಗೆ ಸರ್ಕಾರದಿಂದ ಗೌರವಾದರಗಳು, ಓದಿನಲ್ಲಿ ಹಿಂದಿದ್ದ ಮಕ್ಕಳು ಈ ವಾರದಿಂದ ಪ್ರಗತಿ ಸಾಧಿಸುವರು, ಕೃಷಿಕ ಮಿತ್ರರಿಗೆ ಹೆಚ್ಚಿನ ಆದಾಯ, ವೈಯಕ್ತಿಕವಾಗಿ ಮತ್ತೊಬ್ಬರನ್ನು ಹಳಿಯುವ ಭರದಲ್ಲಿ ನೀವು ಅವಮಾನಕ್ಕೆ ಒಳಗಾಗಬೇಕಾದೀತು. ಬಹಳ ದಿನಗಳಿಂದ ನಿಧಾನಗತಿಯಲ್ಲಿ ಸಾಗಿದ್ದ ಕೆಲಸಗಳು ಪ್ರಭಾವೀ ವ್ಯಕ್ತಿಗಳ ನೆರವಿನಿಂದ ಸುಗಮವಾಗಿ ಸಾಗಲಿವೆ, ಗೆಳೆಯರ ನಡುವೆ ಇರುವ ಭಿನ್ನಾಭಿಪ್ರಾಯವನ್ನು ಸಾಧ್ಯವಾದಷ್ಟು ಬೇಗ ಬಗೆಹರಿಸಿಕೊಳ್ಳಿ. ಲೇವಾದೇವಿ ವ್ಯವಹಾರದಲ್ಲಿ ನಷ್ಟವಾಗುವ ಸಂಭವವಿದೆ. ಕರಿದ ಪದಾರ್ಥಗಳ ಅತಿಯಾದ ಸೇವನೆಯಿಂದ ಚರ್ಮ ಸಂಬಂಧಿ ಆರೋಗ್ಯ ಸಮಸ್ಯೆ, ವ್ಯಾಪಾರಿಗಳಿಗೆ ಹೆಚ್ಚಿನ ಲಾಭಗಳು. ಗುರು-ಶುಕ್ರ-ಶನಿ- ಶುಭ ದಿನಗಳು.


ಕುಂಭ (ಧನಿಷ್ಠಾ, ಶತಭಿಷಾ, ಪೂರ್ವಾಭಾದ್ರ 1,2,3)
(ಗು.ಗೆ.ಗೊ.ಸ.ಸಿ.ಸು.ಸೆ.ಸೋ.ದ)

ಸ್ವಂತ ವಿವೇಚನೆಯಿಲ್ಲದೆ ನಿಮ್ಮ ಅವಿವೇಕತನದಿಂದಾಗಿ ಮೂರಾಬಟ್ಟೆಯಾಗಿದ್ದ ಬದುಕು, ಒಂದು ತಹಬಂದಿಗೆ ಬರಲಿದೆ. ಇನ್ನಾದರೂ ವಿವೇಕದಿಂದ ಇರುವುದು ಮೇಲು. ವಾಣಿಜ್ಯ ಸಂಬಂಧಿ ವ್ಯವಹಾರವೊಂದಲ್ಲಿ ನೀವು ಮಧ್ಯಸ್ಥರಾಗಬೇಕಾದ ಪ್ರಸಂಗ ಬರಲಿದ್ದು, ಜಾಣ್ಮೆಯಿಂದ ವರ್ತಿಸುವುದು ಉತ್ತಮ. ಸಂಕಷ್ಟದಲ್ಲಿರುವ ಗೆಳೆಯನಿಗೆ ನಿಮ್ಮ ಸಲಹೆ, ಹಿರಿಯರ ಬೇಡಿಕೆಗಳಿಗೆ ತುಸು ಹೆಚ್ಚೇ ಎನ್ನಬಹುದಾದ ಖರ್ಚು, ತಾಯಿಯೊಂದಿಗಿದ್ದ ಮುನಿಸು ಕಡಿಮೆಯಾಗಲಿದೆ. ಸಂತಾನಾಪೇಕ್ಷಿಗಳಿಗೆ ಶುಭ ಸಮಾಚಾರ, ಅವಸರದಲ್ಲಿ ಆರಂಭಿಸಿದ ಉದ್ಯಮ, ಮಂದಗತಿಯಲ್ಲಿ ಸಾಗಲಿದೆ.ಸಂಗೀತಗಾರರಿಗೆ ಉತ್ತಮ ದಿನಗಳು. ಹೈನುಗಾರಿಕೆಯಲ್ಲಿ ಸಾಕಷ್ಟು ಲಾಭ. ಸೋಮ-ಬುಧ-ಶನಿ-ಶುಭ ದಿನಗಳು.


ಮೀನ (ಪೂರ್ವಾಭಾದ್ರ 4, ಉತ್ತರಾಭಾದ್ರ, ರೇವತಿ)
(ದಿ.ದು.ಖ.ಝ.ಥ.ದೆ.ದೋ.ಖ.ಚ.ಚಿ.)

ಮನೆಯ ಸದಸ್ಯರು ಮಾಡುವ ಮಿತಿಮೀರುತ್ತಿರುವ ಖರ್ಚಿಗೆ ಕಡಿವಾಣ ಬೀಳಲಿ, ಜೊತೆಗೆ ಸಂಗಾತಿಯ ಆರೋಗ್ಯದಲ್ಲಿ ವ್ಯತ್ಯಾಸ, ವೈದ್ಯಕೀಯ ವೆಚ್ಚ ಹೆಚ್ಚಾಗಲಿದೆ.ಕೈಗಾರಿಕೋದ್ಯಮಿಗಳು ತಮ್ಮ ತಪ್ಪು ನಿರ್ಧಾರಗಳಿಂದಾಗಿ ಅನೇಕ ಸಮಸ್ಯೆಗಳನ್ನು ಎದುರಿಸ ಬೇಕಾಗುತ್ತದೆ. ಮನೆಯಲ್ಲಿ ನಡೆಯಲಿರುವ ಮಂಗಳ ಕಾರ್ಯಗಳಿಗೆ ನಿಮ್ಮದೇ ನೇತೃತ್ವ.ಅವಿವಾಹಿತರಿಗೆ ಕಂಕಣ ಭಾಗ್ಯ, ದಿನ ಬಳಕೆ ವಸ್ತುಗಳ ಮಾರಾಟಗಾರರಿಗೆ ಭರ್ಜರಿ ವ್ಯಾಪಾರ, ಉದ್ಯಮಿಗಳು ತಮ್ಮ ಪಾಲುದಾರರ ಸಲಹೆಗಳನ್ನು ಗಂಭೀರವಾಗಿ ಪರಿಗಣಿಸುವುದು ಉತ್ತಮ. ಬುಧ-ಗುರು-ಶನಿ- ಶುಭ ದಿನಗಳು.


ವಿಶೇಷ ದಿನಗಳು : ದಿನಾಂಕ : 16.2.2022 ನೇ ಬುಧವಾರ ಭಾರತ ಹುಣ್ಣಿಮೆ, ಶ್ರೀ ಕ್ಷೇತ್ರ ಹರಿಹರದಲ್ಲಿ ಶ್ರೀ ಹರಿಹರೇಶ್ವರ ಸ್ವಾಮಿ ಬ್ರಹ್ಮ ರಥೋತ್ಸವ, ಶ್ರೀ ಕ್ಷೇತ್ರ ಮೈಲಾರದಲ್ಲಿ ಕಾರಣೀಕ. ಮಧ್ವನವಮೀ.
ಶ್ರೀ ಕ್ಷೇತ್ರ ಕಡ್ಲೆಬಾಳು ಶ್ರೀ ಮಧ್ವಾಂಜನೇಯ ಸ್ವಾಮಿ ರಥೋತ್ಸವ.