ವಾರ ಭವಿಷ್ಯ

Home ವಾರ ಭವಿಷ್ಯ

24.10.2021 ರಿಂದ 30.10.2021

ಜಯತೀರ್ಥಾಚಾರ್ ವಡೇರ್, ದಾವಣಗೆರೆ. 

ಮೇಷ (ಅಶ್ವಿನಿ, ಭರಣಿ, ಕೃತ್ತಿಕಾ)
(ಚೂ.ಚೇ.ಚೋ.ಲ.ಲಿ.ಉ.ಲೇ.ಲೊ.ಅ.)

ಕಲಾವಿದರಿಗೆ ಬರಬೇಕಾಗಿರುವ ಸಂಭಾವನೆ ಕೈಸೇರಲಿದೆ. ಸರ್ಕಾರದಿಂದ ನೆರವು, ಹೋಟೆಲ್‌ ಉದ್ಯಮದಲ್ಲಿ ಸಾಕಷ್ಟು ಚೇತರಿಕೆ. ಹಣಕಾಸು ವ್ಯವಹಾರದಲ್ಲಿ ನಷ್ಟ, ನಿರುದ್ಯೋಗಿಗಳ ಸಮಸ್ಯೆ ತಕ್ಕಮಟ್ಟಿಗೆ ಪರಿಹಾರವಾಗಲಿದೆ. ಯಾವುದೇ ಕಾರಣಕ್ಕೂ ಆತ್ಮಸಾಕ್ಷಿಗೆ ವಿರುದ್ಧವಾಗಿ ನಡೆದುಕೊಳ್ಳಬೇಡಿ. ಉದ್ಯಮಿಗಳು ಸರ್ಕಾರ ಕೊಡುವ ಭರವಸೆ ಯನ್ನೇ ನಂಬುವುದರಲ್ಲಿ ಅರ್ಥವಿಲ್ಲ. ಪ್ರಯಾಣದಿಂದ ದೇಹಾಯಾಸ, ನ್ಯಾಯಾಲಯಗಳ ವ್ಯಾಜ್ಯಗಳನ್ನು ಕೋರ್ಟ್‌ ಹೊರಗೆ ರಾಜೀ-ಪಂಚಾಯ್ತಿ ಮೂಲಕ ಬಗೆಹರಿಸಿಕೊಳ್ಳಿ, ಬೇರಯವರ ವೈಯಕ್ತಿಕ ಭಾವನೆಗಳನ್ನು ಗೌರವಿಸುವುದನ್ನು ಕಲಿಯಿರಿ. ಹಿರಿಯರಿಂದ ಉತ್ತಮ ಸಲಹೆಗಳು, ಭಾನು -ಮಂಗಳ – ಗುರು- ಶುಭ ದಿನಗಳು.


ವೃಷಭ (ಕೃತ್ತಿಕಾ, 2,3,4, ರೋಹಿಣಿ, ಮೃಗ 1,2)
(ಇ.ಉ.ಎ.ಒ.ವ.ವಿ.ವು.ವೆ.ವೋ)

ವಿದೇಶದಲ್ಲಿರುವವರಿಗೆ ಹೆಚ್ಚಿನ ಸೌಲಭ್ಯಗಳೊಂದಿಗೆ ವೇತನದಲ್ಲೂ ಹೆಚ್ಚಳ.ಬೇರೆ ಕಡೆ ಲಕ್ಷ್ಯಕೊಡದೆ, ನಿಮ್ಮ ಕರ್ತವ್ಯದಲ್ಲಿ ತೊಡಗಿಕೊಳ್ಳುವುದು ಮೇಲು. ಅತ್ಯುನ್ನತ ಗುತ್ತಿಗೆದಾರರಿಗೆ, ದೇಶ-ವಿದೇಶಗಳಿಂದ ಉತ್ತಮ ಅವಕಾಶಗಳು, ಮೋಟರ್ ವಾಹನಗಳ ಬಿಡಿಭಾಗಗಳ ವ್ಯವಹಾರ ವಿಸ್ತರಿಸುತ್ತಾ ಹೋಗಲಿದೆ. ಆದಾಯದ ಮೂಲದಲ್ಲಿ ಹೆಚ್ಚಳ, ಪ್ರಾಚೀನ ವೈದ್ಯಕೀಯ ಪದ್ಧತಿ ನಡೆಸುತ್ತಿರುವವರಿಗೆ ಬೇಡಿಕೆ, ಅವಿವಾಹಿತರಿಗೆ ಕಂಕಣಬಲ, ಹಣಕಾಸಿನ ಪರಿಸ್ಥಿತಿ ಸಾಧಾರಣವಾಗಿರುವುದರಿಂದ, ಹೊಸ ಯೋಜನೆಗಳನ್ನು ಸದ್ಯದ ಮಟ್ಟಿಗೆ ಮುಂದೂಡಿ, ಗುರುಗಳ ಸೇವೆಮಾಡಿರಿ. ಗುರು -ಶುಕ್ರ -ಶನಿ -ಶುಭ ದಿನಗಳು.


ಮಿಥುನ (3,4, ಆರಿದ್ರಾ, ಪುನರ್ವಸು 1,2,3)
(ಕ.ಕಿ.ಕು.ಘ, ಔ, ಚ.ಕೆ.ಕೋ.ಹ.)

ಆತ್ಮವಿಶ್ವಾಸದೊಂದಿಗೆ  ವ್ಯವಹಾರವನ್ನು ಮುಂದುವರೆಸಿಕೊಂಡು ಹೋದಲ್ಲಿ  ನಿಮ್ಮ ಭಾಗ್ಯವನ್ನೇ ಬದಲಾಯಿಸಲಿದೆ. ಇದರಿಂದ ಸಾರ್ಥಕ ಮನೋಭಾವ ಹೊಂದುವಿರಿ.  ಶುಭ ಸಮಾರಂಭಕ್ಕೆ ಪರಿವಾರದೊಡನೆ ಭಾಗವಹಿಸುವಿರಿ, ಶ್ರಮಪಡುವುದು  ಜೀವನದಲ್ಲಿ ಅನಿವಾರ್ಯವಾದರೂ, ಅದಕ್ಕೊಂದು ಇತಿಮಿತಿ ಹಾಕದೇ ಹೋದಲ್ಲಿ , ಅದು ಆರೋಗ್ಯದ ಮೇಲೆ ಅಡ್ಡಪರಿಣಾಮ, ವ್ಯವಹಾರದಲ್ಲಿ ನೆರವು ಕೋರುವ ಸ್ನೇಹಿತರಿಗೆ ಮುಕ್ತ ಹಸ್ತದಿಂದ ಸಹಾಯ ಮಾಡುವಿರಿ. ಅತಿವೇಗದ ವಾಹನ ಚಾಲನೆ ಅಪಾಯಕ್ಕೆ ಆಹ್ವಾನ, ಕುಲದೇವತಾ ದರ್ಶನ ಭಾಗ್ಯ ಒದಗಿಬರಲಿದೆ. ಸೋಮ -ಮಂಗಳ -ಬುಧ – ಶುಭ ದಿನಗಳು.


ಕರ್ಕಾಟಕ (ಪುನ 4, ಪುಷ್ಯ, ಆಶ್ಲೇಷ)
(ಹಿ.ಹು.ಹೆ.ಹೂ.ಡ.ಡಿ.ಡು.ಡೆ.ಡೋ)

ರೈತಾಪಿ ಮಿತ್ರರಿಗೆ  ಈ ಹಿಂದೆ ನಡೆದ ಘಟನೆಗಳಿಂದ ಆದ ನಷ್ಟಗಳು ಈ ವಾರದಿಂದ ಭರ್ತಿಯಾಗಲಿವೆ. ಜೊತೆಗೆ, ಸರ್ಕಾರದಿಂದ ಧನ ಸಹಾಯ, ಹಣ್ಣು, ತರಕಾರಿ, ಹೂವು, ಮಾರಾಟ ಹೆಚ್ಚಲಿದೆ, ಉಳಿತಾಯದ ಗಂಟು ಕರಗುವ ಮುನ್ನ, ಅದಕ್ಕೊಂದು ಸರಿಯಾದ ವ್ಯವಸ್ಥೆಯನ್ನು ಮಾಡುವುದು ಲೇಸು. ಮಗನಿಗೆ ಹೆಂಡತಿಯ ತವರುಮನೆಯಿಂದ ನೆರವು, ಹೊಸ ಯೋಜನೆಗಳ ತಂತ್ರವನ್ನು ಮತ್ತೊಬ್ಬರ ಬಳಿ ಹೇಳಬೇಡಿ. ಹಿತಶತ್ರುಗಳು ಅದನ್ನು ದುರುಪಯೋಗಪಡಿಸಿಕೊಳ್ಳಬಹುದು. ವಿದ್ಯಾರ್ಥಿಗಳು ಆತ್ಮವಿಶ್ವಾಸ ಬೆಳೆಸಿಕೊಳ್ಳಿ, ಮನೆಯ ಹಿರಿಯರ ಆರೋಗ್ಯಕ್ಕಾಗಿ ತುಸು ಖರ್ಚು, ಹಣಕಾಸಿನ ಪರಿಸ್ಥಿತಿ  ಸಾಧಾರಣ. ಗೋವು ಮತ್ತು ಗುರುಗಳ ಸೇವೆ ಮಾಡಿ. ಸೋಮ -ಬುಧ -ಗುರು -ಶುಭ ದಿನಗಳು.


ಸಿಂಹ ( ಮಘ, ಪುಬ್ಬ, ಉತ್ತರ 1)
(ಮ.ಮಿ.ಮು.ಮೋ.ವೆ.ಟ.ಟಿ.ಟು.ಟೆ)

ಸರ್ಕಾರಿ ನೌಕರರಿಗೆ ಅವರ ಮೇಲಾಧಿಕಾರಿಗಳಿಂದ ಪ್ರಶಂಸೆ ಮಾತುಗಳೊಂದಿಗೆ, ಪದೋನ್ನತಿಗೆ ಶಿಫಾರಸ್ಸು, ರಾಜಕೀಯ ರಂಗದಲ್ಲಿರುವವರಿಗೆ ಜನಾನುರಾಗದೊಂದಿಗೆ ಪಕ್ಷದಲ್ಲಿ ಉತ್ತಮ ಸ್ಥಾನಮಾನ, ಅರ್ಧಕ್ಕೇ ನಿಂತಿದ್ದ ಕೆಲಸಗಳು ಸ್ನೇಹಿತರ ಸಹಾಯದಿಂದ ಮತ್ತೆ ಚಾಲನೆ, ತೈಲೋದ್ಯಮದಲ್ಲಿ ಈ ಹಿಂದೆ ಹೂಡಿದ್ದ ಬಂಡವಾಳ ಲಾಭ ತರಲಿದೆ. ಬಂಧುಗಳೊಂದಿಗಿದ್ದ ವೈಮನಸ್ಯ ದೂರವಾಗಿ ಸಾಮರಸ್ಯ ಮೂಡಲಿದೆ. ಸೋದರಿಯ ಆರೋಗ್ಯದ ಚಿಂತೆ ನಿಮ್ಮನ್ನು ಬಾಧಿಸಲಿದೆ. ಅತಿಥಿಗಳ ಆಗಮನದಿಂದ ಮನೆಯಲ್ಲಿ ಹಬ್ಬದ ವಾತಾವರಣ, ಸಂತಸದ ಕ್ಷಣಗಳನ್ನು ಅನುಭವಿಸುವಿರಿ. ಆದಾಯದ ಮೂಲದಲ್ಲಿ ಹೆಚ್ಚಿನ ಕೊರತೆ. ಖರ್ಚಿಗೊಂದು ಮಿತಿಯಿರಲಿ. ಭಾನು -ಮಂಗಳ -ಶುಕ್ರ -ಶುಭ ದಿನಗಳು.


ಕನ್ಯಾ (ಉತ್ತರಾ 2,3,4, ಹಸ್ತಾ, ಚಿತ್ತಾ 1,2)
(ಟೋ.ಪ.ಪಿ.ಪು.ಷ.ಣ.ಠ.ಪೆ.ಪೋ)

ಉದ್ಯಮ ಕ್ಷೇತ್ರದಲ್ಲಿರುವ ಮಹಿಳೆಯರು ಸಾಕಷ್ಟು ಉತ್ತಮ ಸಾಧನೆಗಳನ್ನು ಮಾಡಿ, ಕೀರ್ತಿ ಪತಾಕೆ ಹಾರಿಸುವರು. ಆತ್ಮಾಭಿಮಾನ ಒಳ್ಳೆಯದೇ ಆದರೂ ಅದು ಅತಿಯಾದಲ್ಲಿ, ಅಪಾಯವನ್ನುಂಟು ಮಾಡಬಹುದು. ವ್ಯಾಪಾರದಲ್ಲಿ ಭರವಸೆ ಕಳೆದುಕೊಂಡ ವರ್ತಕರಿಗೆ, ಮಾರುಕಟ್ಟೆಯಲ್ಲಿ ಭರವಸೆ ಕಂಡುಬರಲಿದೆ. ಗೃಹನಿರ್ಮಾಣದ ವಿಚಾರವನ್ನು ಕೈಗೆತ್ತಿಕೊಳ್ಳಲು ಇದು ಸಕಾಲ. ಸೋದರನ ಮದುವೆ ವಿಚಾರ ಈ ವಾರ ಮುನ್ನೆಲೆಗೆ ಬರಲಿದೆ. ಮಕ್ಕಳ ನಡಾವಳಿಯಲ್ಲಿ ಕಂಡುಬರುವ ವ್ಯತ್ಯಾಸದಿಂದ ಮನಸ್ಸಿಗೆ ಮುಜುಗುರ, ವಿವಾದಗಳಿಂದ ದೂರವಿರುವುದನ್ನು ಕಲಿಯಿರಿ. ವಾಹನ ಚಾಲನೆ ವೇಳೆ ತುಸು ಮೈರೆತರೂ, ಅಪಘಾತ ತಪ್ಪಿದ್ದಲ್ಲ. ಗುರುಗಳ ಸೇವೆಮಾಡಿ. ಬುಧ -ಗುರು -ಶನಿ -ಶುಭ ದಿನಗಳು.


ತುಲಾ (ಚಿತ್ತಾ 3,4, ಸ್ವಾತಿ, ವಿಶಾಖ 1,2,3)
(ರ.ರಿ.ರು.ರೆ.ರೊ.ತ.ತಿ.ತು.ತೆ.)

ಆರ್ಥಿಕ ಮುಗ್ಗಟ್ಟಿಗೆ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುವಿರಿ. ಹಿರಿಯರ ಆರೋಗ್ಯದಲ್ಲಿ ಚೇತರಿಗೆ ನಿವೇಶನದ ಖರೀದಿ ವಿಚಾರವನ್ನು  ಅನುಭವಿಗಳ ಬಳಿ ಚರ್ಚಿಸಿ, ನಂತರ ನಿರ್ಧಾರ ತೆಗೆದುಕೊಳ್ಳುವುದು ಮೇಲು. ರೂಢಿಸಿಕೊಂಡಿರುವ ದುರಭ್ಯಾಸವನ್ನು ಬಿಡುವುದು ಉತ್ತಮ. ನೀವು ತೆಗೆದುಕೊಳ್ಳುವ  ತಪ್ಪು ನಿರ್ಣಯಗಳು, ಮನೆಮಂದಿಯನ್ನು ಚಿಂತೆಗೀಡುಮಾಡಲಿವೆ. ವ್ಯವಹಾರದಲ್ಲಿ ಮುಂದೆ ಹೋಗಿದ್ದ ಪಾಲುದಾರಿಕೆ ಮಾತುಕತೆಗಳು ಮತ್ತೆ ಮುನ್ನೆಲೆಗೆ ಬರಲಿದೆ. ಕಟ್ಟಡ ಸಾಮಗ್ರಿ ಮಾರಾಟಗಾರರಿಗೆ ಭರ್ಜರಿ ವ್ಯಾಪಾರವಾಗಲಿದೆ.ಆದಾಯದ ಮೂಲದಲ್ಲಿ ಹೆಚ್ಚಳ, ಅಧ್ಯಾಪಕ ವೃತ್ತಿಯಲ್ಲಿರುವವರಿಗೆ ಉತ್ತಮ ದಿನಗಳು. ಗುರು -ಶುಕ್ರ -ಶನಿ -ಶುಭ ದಿನಗಳು.


ವೃಶ್ಚಿಕ (ವಿಶಾಖ 4, ಅನೂ, ಜೇಷ್ಠ)
(ತೊ.ನ.ನಿ.ನು.ನೆ.ನೋ.ಯ.ಯು.)

ನಿಮ್ಮ ವರ್ಚಸ್ಸು ಕಾರ್ಯಕ್ಷೇತ್ರದಲ್ಲಿ ಯಶಸ್ಸಿಗೆ ಕಾರಣವಾಗಲಿದೆ. ವೈಯಕ್ತಿಕ ಸಮಸ್ಯೆಗಳಿಗೆ ಸೂಕ್ತ ವ್ಯಕ್ತಿಯಿಂದ ಉತ್ತಮ ಪರಿಹಾರ, ಮಕ್ಕಳಿಗೆ ಜವಾಬ್ದಾರಿಯ ಅರಿವನ್ನುಂಟುಮಾಡಿಕೊಡಲು ಸಕಾಲ. ಮೀರಿದಲ್ಲಿ ಅವರೇ ನಿಮಗೆ ಬುದ್ಧಿವಾದವನ್ನು ಹೇಳಬಹುದು. ತುಸು ಜಾಣ್ಮೆಯಿಂದ ಆಲೋಚಿಸಿದಲ್ಲಿ ದೊಡ್ಡ ಮಟ್ಟದ ಉದ್ಯೋಗವೇ ಕೈಗೆಟುಕಬಹುದು. ವಿದ್ಯಾರ್ಥಿಗಳ ಪ್ರತಿಭಾ ಪ್ರದರ್ಶನಕ್ಕೆ ಉತ್ತಮ ವೇದಿಕೆ ಸಿಗಲಿದೆ. ಮತ್ತೊಬ್ಬರೊಂದಿಗೆ ವಿನಾಕಾರಣ ವಾಗ್ವಾದ ಮಾಡುವುದರಿಂದ ನಿಮ್ಮ ಘನತೆಗೆ ಧಕ್ಕೆ, ಅಪರಿಚಿತರೊಂದಿಗೆ ಹಣಕಾಸಿನ ವ್ಯವಹಾರಬೇಡ. ಆರೋಗ್ಯದ ವಿಚಾರದಲ್ಲಿ ಉದಾಸೀನತೆ ಬೇಡ. ಭಾನು -ಸೋಮ -ಮಂಗಳ- ಶುಭ ದಿನಗಳು.


ಧನಸ್ಸು (ಮೂಲ, ಪೂರ್ವಾಷಾಡ, ಉತ್ತರಾಷಾಡ)
(ಯೆ.ಯೋ. ಬ.ಬಿ.ಬು.ಧ.ಫ.ಡ.ಬೆ.)

ಹಲವು ಸಂಘ-ಸಂಸ್ಥೆಗಳಿಗೆ ಕಾನೂನಿನ ತೊಡಕುಗಳು ಎದುರಾಗಲಿವೆ. ಸೂಕ್ತ ವಕೀಲರೊಂದಿಗೆ ಸಮಾಲೋಚಿಸಿ, ಮಡದಿಯು ನೀಡಬಹುದಾದ ಹಲವು ಸಲಹೆಗಳು ಮುಂದೆ ನಿಮ್ಮ ಪ್ರಯೋಜನಕ್ಕೆ ಬರಲಿವೆ. ಆಸ್ತಿಗಿದ್ದ ಶತ್ರುಗಳ ಬಾಧೆ ನಿವಾರಣೆಯಾಗಲಿದೆ. ಆರ್ಥಿಕ ಸ್ಥಿತಿಗತಿಯು ಕ್ರಮೇಣ ವೃದ್ಧಿಗೊಳ್ಳುವುದರಿಂದ ಹಣಕಾಸಿನ ಪರಿಸ್ಥಿತಿ ಸಾಕಷ್ಟು ಸುಧಾರಿಸಲಿದೆ. ಪರರ ದೋಷಗಳನ್ನು ಹುಡುಕುವ ಮೊದಲು ನಿಮ್ಮ ಆತ್ಮಾವಲೋಕನ ಮಾಡಿಕೊಳ್ಳಿ. ಲೇವಾದೇವಿ ವ್ಯವಹಾರ ಸದ್ಯಕ್ಕೆ ಬೇಡ, ಷೇರು ಮಾರುಕಟ್ಟೆಯಲ್ಲಿ ಹೆಚ್ಚಿನ ಬಂಡವಾಳ ಹೂಡುವ ಸಾಹಸಕ್ಕೆ  ಕೈಹಾಕಬೇಡಿ. ಕುಲದೇವತಾರಾಧನೆ ಮಾಡಿರಿ. ಸೋಮ -ಬುಧ -ಗುರು -ಶುಭ ದಿನಗಳು.


ಮಕರ (ಉತ್ತರಾಷಾಢ 2,3,4, ಶ್ರವಣ, ಧನಿಷ್ಠಾ 1,2)
(ಜೊ.ಜ.ಜಿ.ಜೆ.ಶಿ.ಶು.ಶೇ.ಶೋ.ಗ.ಗಿ)

ವಿದ್ಯಾರ್ಥಿಗಳು ಶಿಸ್ತುಬದ್ಧ ಜೀವನವನ್ನು ರೂಢಿಸಿಕೊಳ್ಳದೇ ಹೋದಲ್ಲಿ, ಮುಂದೆ ತುಂಬಾ ತೊಂದರೆಗಳನ್ನು ಜೀವನದಲ್ಲಿ ಎದುರಿಸಬೇಕಾದೀತು. ಕೈಗಾರಿಕೋದ್ಯಮಿ ಗಳಿಗೆ ಹೊಸ ಅವಕಾಶಗಳು ಬರಲಿದ್ದು, ಸೂಕ್ತವಾದುದನ್ನು ಆರಿಸಿಕೊಳ್ಳುವುದು ಮೇಲು. ಸಕಾರಾತ್ಮಕ ಚಿಂತನೆಗಳನ್ನು ಮಾಡಲು ಪ್ರಯತ್ನಿಸಿ. ಆತ್ಮೀಯರಾದ ಗೆಳೆಯರು ಕೊಡುವ ಉತ್ತಮ ಸಲಹೆಗಳು ನಿಮ್ಮ ವ್ಯಾವಹಾರಿಕ ಸಮಸ್ಯೆಗಳಿಗೆ ಪರಿಹಾರ ಸೂಚಿಸಲಿವೆ.ಉತ್ತಮಗೊಂಡ ಹಣಕಾಸಿನ ಪರಿಸ್ಥಿತಿ, ಹೊಸ ಯೋಜನೆಗಳಿಗೆ ನೆರವಾಗಲಿವೆ. ಮಕ್ಕಳ ವಿದ್ಯಾಭ್ಯಾಸವನ್ನು ಕಡೆಗಣಿಸಬೇಡಿ. ಬದಲಾವಣೆ ಬದುಕಿಗೆ ಉತ್ತಮ ಮಾರ್ಗದರ್ಶನವಾಗಲಿದೆ. ಗೋ ಸೇವೆ ಮಾಡಿರಿ. ಸೋಮ -ಗುರು -ಶನಿ -ಶುಭ ದಿನಗಳು.


ಕುಂಭ (ಧನಿಷ್ಠಾ, ಶತಭಿಷಾ, ಪೂರ್ವಾಭಾದ್ರ 1,2,3)
(ಗು.ಗೆ.ಗೊ.ಸ.ಸಿ.ಸು.ಸೆ.ಸೋ.ದ)

ಉದಾಸೀನತೆಯಿಂದಾಗಿ ವಿದ್ಯಾರ್ಥಿಗಳು ತಮಗೆ ಬರಲಿರುವ ಅತ್ಯುತ್ತಮ ಅವಕಾಶಗಳನ್ನು ತಾವಾಗೆಯೇ ಕೈ ಚೆಲ್ಲುವರು. ವ್ಯವಹಾರದಲ್ಲಿ ಬದಲಾವಣೆ ಬಯಸುವ ನಿಮ್ಮ ಅಭಿಪ್ರಾಯಕ್ಕೆ ಮನ್ನಣೆ ಸಿಗದೇ ಹೋಗಬಹುದು. ಪಾಲುದಾರರೊಂದಿಗೆ ತಾಳ್ಮೆಯಿಂದ ವರ್ತಿಸಿ,  ಕೃಷಿ ಕ್ಷೇತ್ರದಲ್ಲಿ ತೊಡಗಿಕೊಂಡವರಿಗೆ, ಉತ್ತಮ ಆದಾಯದೊಂದಿಗೆ ಹೆಚ್ಚಿನ ಸೌಲಭ್ಯಗಳು ದೊರೆಯಲಿವೆ. ಯಾರೊಂದಿಗೇ ಆಗಲಿ ಅತಿ ಸಲಿಗೆಯಿಂದ ವರ್ತಿಸಬೇಡಿ. ದರ್ಜಿಗಳಿಗೆ ಬಿಡುವಿಲ್ಲದಷ್ಟು ಕೆಲಸ. ಖರ್ಚುವೆಚ್ಚಗಳಲ್ಲಿ ಇತಿಮಿತಿ ಇರಲಿ, ಹಳೇಕಾಯಿಲೆಗಳು ಮತ್ತೆ ಮರುಕಳಿಸದಂತೆ ಎಚ್ಚರ ವಹಿಸಿ. ವಿಷ್ಣುಸಹಸ್ರನಾಮ ಪಠಿಸುವುದು ಉತ್ತಮ. ಗುರು -ಶುಕ್ರ- ಶನಿ -ಶುಭ ದಿನಗಳು.


ಮೀನ (ಪೂರ್ವಾಭಾದ್ರ 4, ಉತ್ತರಾಭಾದ್ರ, ರೇವತಿ)

(ದಿ.ದು.ಖ.ಝ.ಥ.ದೆ.ದೋ.ಖ.ಚ.ಚಿ.)

ವೃತ್ತಿಯಲ್ಲಿ ಹೆಚ್ಚಿನ ಲಾಭವನ್ನು ತಂದರೂ ಕೂಡ ಹೆಚ್ಚುತ್ತಿರುವ ಖರೀದಿಯಿಂದಾಗಿ ಖರ್ಚುಗಳು, ಇರುವುದರಲ್ಲೇ ಹೊಂದಿಸಿಕೊಂಡು ಮನೆ ವಾರ್ತೆ ನಡೆಸುವುದು ಉತ್ತಮ.  ಮನೆಮಂದಿಯೊಂದಿಗೆ ಅನಗತ್ಯವಾಗಿ ಮಾತು ಬೆಳೆಸಬೇಡಿ. ಪೀಠೋಪಕರಣ ತಯಾರಕರಿಗೆ ವಹಿವಾಟು ಹೆಚ್ಚಲಿದೆ. ಔಷಧಿ ತಯಾರಕರಿಗೆ, ತಪಾಸಣಾಧಿಕಾರಿಗಳಿಂದ ಅನಗತ್ಯ ಕಿರುಕಳ, ಲೆಕ್ಕಪರಿಶೋಧಕರಿಗೆ ಬೇಡಿಕೆ ಹೆಚ್ಚಲಿದೆ. ವೃಥಾ ತಿರುಗಾಟದಿಂದ ದೇಹಾಲಸ್ಯ, ಅತಿಯಾದ ಮೋಜು, ಮಸ್ತಿ ಆರೋಗ್ಯ ದೃಷ್ಟಿಯಿಂದ ಒಳ್ಳೆಯದಲ್ಲ. ಗುರು- ಹಿರಿಯರನ್ನು ಗೌರವಿಸಿರಿ. ಭಾನು -ಬುಧ -ಗುರು -ಶುಭ ದಿನಗಳು.


ವಿಶೇಷ ದಿನಗಳು : ದಿನಾಂಕ :- 24.10.2021 ಭಾನುವಾರ ಸಂಕಷ್ಟಚತುರ್ಥೀ ಚಂದ್ರೋದಯ ರಾತ್ರಿ 8.40 ಕ್ಕೆ.